مساحة إعلانية 728×90

ما معنى المستخلص فى شركات المقاولات وانواعة



الناس اللي مش عارفة يعني اية مستخلص تعالوا مع بعض نتعلم ونعرف يعني ايه مستخلص وايه هي أنواع المستخلصات وكيفيه عمل المستخلصات بإحترافية فى محاسبة المقاولات :

اول نوع من المستخلصات هو مستخلص المالك أو العميل
ثاني نوع من المستخلصات هو مستخلص مقاولي الباطن
ثالث نوع من المستخلصات هو المستخلص التنفيذي للمشروع

اوبا ايه دا كله يا عم الحاج. لا لا لا متقلقش الموضوع ابسط من البساطة وأسهل منه مفيش بس نركز مع بعض

تعالوا نبدأ بالنوع الثالث من تحت لفوق :


أولا المستخلص التنفيذي ويعني ايه مستخلص تنفيذي :


المستخلص التنفيذي يا سيدي هو عبارة عن عملية حصر هندسية بيقوم بيها مهندسين المشاريع بشركات المقاولات لكميات بنود الأعمال اللي كانت في كراسة الشروط أو المقايسات اللي طلبها العميل من شركة المقاولات بعد الموافقة على عرض السعر وعمل عقد ببنود المقايسات وبالتالي شكل المستخلص بيكون عبارة عن كمية البند على سبيل المثال
مثلاً أعمال الخرسانات المسلحة لصب القواعد وليكن مثلا كان مطلوب منه في العقد والمقايسة كمية 1000 متر والمهندس قام بدورة في الإشراف على تنفيذ مخطط المشروع وعمل عملية حصر الكميات اللي تم تنفيذها من كمية العقد أو المقايسات

على سبيل المثال المهندس أثناء الإشراف على الموقع لاقي انه انتهى من كمية ال 1000 متر 350 متر فيقوم المهندس بتدوين كمية الأعمال اللي تم حصرها في مستخلص بأكثر من فئة سعرية










بأكثر من فئة سعرية ازاي الكلام ده هو فيه كده ¡¡¡¡¡¡¡¡¡¡
هقولك متقلقش المهندس بدورة بيقوم بحصر الكميات داخل موقع المشروع داخل المستخلص اولا بسعر التكلفة التقديرية اللي بتحصل عليه بعد تحليل وتسعير المهندس للمقايسة أو كراسة شروط المشروع اللي عمل بيها عرض السعر للمالك بعد ما ضاف نسبة ربحيته لكل بند في عرض السعر

وثانيا سعر التكلفة الفعلية اللي اتكلفها تنفيذ البند على أرض الواقع

ثالثا بقى سعر البيع اللي قدمته في عرض السعر لمالك المشروع أو العميل وبالتالي المستخلص ده هو روح المشروع اللي المهندس بيراقب بيه تنفيذ المشروع ومراقبة المشروع من حيث التكلفة والوقت وهل انا حققت قيمة الربح المطلوب في التنفيذ ولا انا أنجزت الكميات المطلوبة بتكلفة أعلى قللت هامش الربح اللي كنت حاطه في عرض السعر بناء على التكلفة التقديرية ولا انا أنجزت البنود بتكلفة أعلى غطت على هامش ربحي
وكانت أعلى من سعر البيع بتاعي وبالتالي يبقى انا خسران في تنفيذ المشروع وبنائا على ذلك بيدور علي أسباب الانحراف ويعالجها أو أنه يقرر انه يوقف عمل على المشروع ده.

أنا شايفكم اتخضيتوا لا الموضوع ابسط من البساطة لأن بإختصر شديد المستخلص ده مستخلص هندسي بحت وبيقوم بتجهيزه مهندسين المشاريع للإدارة ومتابعة خط سير تنفيذ المشروع طبقا لل Budget اللي كانت موضوعه مسبقا والجدول الزمني.


النقطة رقم 2 مستخلص مقاول الباطن ويعني ايه مستخلص مقاول الباطن :

تعالوا بقى نبدأ من هنا شغل المحاسبة والحسابات لشركات المقاولات ؛ واحنا عندنا في النشاط التجاري تكلفة البضاعة بنتج من القيام بعملية شراء للمنتجات المراد بيعها بواقع فاتورة مشتريات ثم القيام ببيع وتسليم العميل البضاعة بعمل فاتورة مبيعات بسعر البيع لهذه المنتجات بفاتورة مبيعات ومن هنا بقدر اني احصل علي مجمل ربح للنشاط اللي هو بيساوي







صافي المبيعات - تكلفة البضاعة المباعة = مجمل الربح

بالظبط زي ما خطر ببالكم هو فعلا دي العلاقة بين مستخلص مقاول الباطن ومستخلص المالك يعني مستخلص مقاول الباطن هو بمثابة فاتورة المشتريات في قطاع المقاولات ومستخلص المالك هو فاتورة البيع

بيتهيألي كده وضح الفرق بين مستخلص مقاول الباطن ومستخلص المالك بكل بساطة.

يلاا نعرف ازاي بنعمل مستخلص مقاول الباطن والحكاية بتبدأ من فين :
اول حاجه ان مهندس المشروع بيتفق مع المقاولين اللي هينفذوا عملية صب وتوريد الخرسانة وبيقدمو معاهم على الأسعار والكميات بعد كده بيقوم مقاول الباطن بدورة وعمل المطلوب منه ويقدم مستخلص فيه الكميات اللي عملها من بنود الأعمال اللي اتفق عليها معاه المهندس وعملوا بيها عقد
بعد كده بيقوم المهندس بدورة في مراجعة المستخلصات ده فنيا من حيث التنفيذ وكفائته ولو فيه اي عيب في التنفيذ بيتم استقطاع بعض الخصومات زي تأمين ضمان أعمال بيتم رده بالكامل في حالة أن المقاول ا صلح العيوب دي وبالتالي بعد المراجعة من المهندس واعتماده المستخلص فنيا بيقوم المحاسب بدورة واعتماده
ومراجعة ماليا بقيد استحقاق للتكلفة وبيكون المستخلص بيحتوي على كمية البند وسعره من واقع العقد اللي تم عمله وكان نسبة خصم ضمان الأعمال
ويتم إثبات المستخلص كاالتالي :

من مذكورين
ح / تكاليف عمليات ( أعمال مقاولي الباطن) كمية * سعر تكلفة

إلى مذكورين
ح / جاري مقاولين الباطن
ح / تأمين ضمان أعمال مقاولي الباطن








بعد كده بيتم عملية السداد للمستحق للمقاول ويتم إثبات السداد بالقيد التالي :

من ح / جاي مقاولين الباطن

إلى ح / البنك أو أوراق الدفع أو الخزينة

علي حسب طريقة السداد المتبعة في كل شركة

أظن كده حضرتكم خمنتم شكل مستخلص المالك لوحدكم.


ثالثا مستخلص المالك أو العميل ويعني ايه مستخلص مالك أو عميل وإزاي بيتم تجهيزه وعمله :


طبعا مستخلص المالك هو بيكون فاتورة البيع في نشاط المقاولات وعشان اقدر اعمله لازم اكون عملت عملية حصر في المواقع بالكميات اللي تم تنفيذها وده بيقوم بيها مهندس المشروع وبردوا بكون راجعت عملية التنفيذ في موقع المشروع لمقاولين الباطن عشان اقدر احدد الكميات التي تم الانتهاء منها بنسبة إنجاز وتنفيذ 100% وبنائا على حصر هذه الكميات دي من مهندس الموقع في المستخلص التنفيذي

بعد كده بيتم تقديم مستخلص المالك بالكميات المنفذة بسعر البيع وبيقوم المهندس الاستشاري التابع لمالك المشروع أو العميل بنفس الدور اللي قام به مهندس الشركة في مراجعة شغل مقاولين الباطن ولو فيه اي كميات من وجهة نظرة مش اتنفذت طبقا للمواصفات اللي تم الاتفاق عليها بيقوم هو كمان بدورة في خصم ضمان الأعمال أو أي خصم آخر لحين تسليم الشغل بالمواصفات المتفق عليها في العقد وبالتالي بيكون القيد اللي بثبات بيه الإيراد الخاص بمستخلص المالك كالتالي :

من مذكورين
ح / جاري العملاء
ح / تأمين ضمان أعمال العملاء

إلى مذكورين
ح / إيرادات العمليات والمشاريع ( كمية * سعر البيع)

أظن كده بكل بساطة وضح العلاقة بين الثلاث أنواع المستخلصات المستخلص التنفيذي ومستخلص مقاول الباطن ومستخلص المالك ودور كل من المحاسب ومهندس المشروع فيهم بكل بساطة أدى يا سيدي قصة وحكاية المستخلصات في قطاع المقاولات

اللي مش هتقدر تتخيله بقى ان القصة دي كلها بتتعمل أوتوماتيك ومربوطة ببعضها في برنامج بابل للمقاولات ابتداءً من إدخال كراسة الشروط أو المقايسة وتحليلها وعمل عرض سعر وعقود المالك ومقاولين الباطن وكمان المستخلصات التنفيذية ومستخلصات مقاولين الباطن ومستخلصات المالك ومتغطية بكافة التقارير ومقارنات التكلفة اللي بتخدم الإدارة المالية والمكتب الهندسي والفني للشركة طبعا ده نموذج مبسط من العمل على المستخلصات في نشاط المقاولات.







كلمات مفتاحية
ما معنى مستخلص فى شركات المقاولات
انواع المستخلصات
نموذج مستخلص اعمال

مستخلص مقاولات

ليست هناك تعليقات

يتم التشغيل بواسطة Blogger.